Шардаралық полицейлер көлікті заңсыз айдап кеткен күдіктіні мас халде қолға түсірді
Өзгенің көлігін заңсыз айдап кету жайты Шардара ауданында орын алды. Бұл жолы Шардара АПБ-не жергілікті тұрғын арызданған. Жәбірленушінің айтуынша қала ішіндегі көшелердің бірінде орналасқан дүкенге өзіне қажетті заттар алу үшін тоқтап, «Ауди -100» маркалы автокөлігін есігі ашық күйде қалдырып кеткен, 5-10 минут аралығында шыққанында көлігін таппай қалған . Жәбірленушіге келтірілген шығын көлемі 500 мың теңгені құрады. Аталған жайт ҚР ҚК-нің 200-бабымен тіркеліп, СДТТБТ-не енгізілді.
Орын алған қылмыстың ізін суытпай ашу мақсатында полиция бөлімінің қызметкерлері жедел-іздестіру жұмыстарын жүргізді. Жан-жақтағы полицейлерге бағыттама берілді. Соның нәтижесінде 1 сағат ішінде жедел уәкілдер жинақталған құжаттар арқылы көліктің ізіне түсті. Күдікті тұрғын автокөлікті қала шетіндегі үйінің ауласына кіргізіп, қойып жатқан жерінен ұстады.
Тексеру барысында күдікті азаматтың ішімдік ішіп алғаны белгілі болды. Ол келе жатып, есігі ашық қалған автокөлікті көріп, айдап кеткені анықталды. Автокөлік айғақты зат ретінде алынып, заңды иесіне қайтарылды. Құқықбұзушылық жасаған тұрғынның бас шарасы «қолхатта».
Қазіргі таңда ҚР ҚК-нің 200-бабы «Автомобильді немесе өзге де көлік құралдарын ұрлау мақсатынсыз заңсыз иелену» бойынша сотқа дейінгі тергеу амалдары жүргізілуде.
Жалпы көліктерді айдап әкетудің көпшілігі автокөлік иелерінің өздерінің бейқамсыздығынан орын алады, яғни көлік жүргізушілері көбіне «темір тұлпарларын» қараусыз қалдырады, есіктерді жабуды ұмытады немесе кілттерді салонда қалдырады. Осындай жағдайларды болдырмау үшін полицейлер жүргізушілерге сақ болуға және көлікті қараусыз қалдырмауға кеңес береді. Сондай-ақ автокөлікті күзет дабылқаққышымен жабдықтап, күзетілетін тұраққа қою керек. Егер сіз автокөлікті айдап әкетудің құрбаны немесе куәгері болсаңыз, тез арада «102» телефоны арқылы полицияға хабарласыңыз.
ТО ПД-нің баспасөз қызметі
